ತಂಗಡಗಿಯಲ್ಲಿ ದರ್ಗಾ ದೇವಿ ಜಾತ್ರೆ ಹಾಗೂ ಸಾಮೂಹಿಕ ವಿವಾಹ ಮಹೋತ್ಸವ
ಮುದ್ದೇಬಿಹಾಳ : ತಂಗಡಗಿ ಗ್ರಾಮದ ಶ್ರೀ ದರ್ಗಾದೇವಿ ಜಾತ್ರೆ ಮಾ.19ರಂದು ಹಾಗೂ ಉಚಿತ ಸಾಮೂಹಿಕ ವಿವಾಹ ಮಾ.20ರಂದು ಸಡಗರದಿಂದ ನಡೆಯಲಿದೆ. 19ರಂದು ಬೆಳಗ್ಗೆ 10ಕ್ಕೆ ಅರಸನಾಳ ಗ್ರಾಮದ ಸಕಲ ಸದ್ಭಕ್ತರಿಂದ ನಂದಿ ಕೋಲು ತಂಗಡಗಿಗೆ ಬರುವುದು. ಸಕಲ ವಾದ್ಯ ವೈಭವದೊಂದಿಗೆ ದೇವಿಯು ಗಂಗಾಸ್ಥಳಕ್ಕೆ ಹೋಗಿ ಬರುವುದು ಮತ್ತು ಪಲ್ಲಕ್ಕಿ ಉತ್ಸವ ಜರುಗುವುದು. ನಂತರ ಮದರಿ ಗ್ರಾಮದ ಸಕಲ ಭಕ್ತರಿಂದ ಪರವಿನ ಗಡಗಿ ತಂಗಡಗಿಗೆ ತರುವುದು. ಮಧ್ಯಾಹ್ನ 3ಕ್ಕೆ ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ ವತಿಯಿಂದ ಜಗ್ಗ ಹಲಗಿ, ಡೊಳ್ಳು ಕುಣಿತ ಮತ್ತು ಕರಡಿ ಮಜಲು, ರಾತ್ರಿ 10ಕ್ಕೆ ಚೌಡಕಿ ಪದಗಳು ಜರುಗಲಿವೆ. ಮಾ.20ರಂದು ಬೆಳಗ್ಗೆ 8:30ಕ್ಕೆ 101 ಕುಂಭಮೇಳ, ಅಗ್ನಿ ಪ್ರವೇಶ ಜರುಗುವುದು. ಮಧ್ಯಾಹ್ನ 12ಕ್ಕೆ 28 ಜೋಡಿ ಉಚಿತ ಸಾಮೂಹಿಕ ವಿವಾಹ ನಡೆಯುತ್ತವೆ. ಬಿಲ್ ಕೆರೂರಿನ ಸಿದ್ಧಲಿಂಗ ಶಿವಾಚಾರ್ಯರು, ಬಸವನ ಬಾಗೇವಾಡಿಯ ಶಿವಪ್ರಕಾಶ ಶಿವಾಚಾರ್ಯರು, ಕುಂಟೋಜಿ ಡಾ. ಗುರು ಚನ್ನವೀರ ಶಿವಾಚಾರ್ಯರು, ಬಳವಾಟದ ಡಾ. ಸೋಮಶೇಖರ ಶಿವಾಚಾರ್ಯರು, ಕರ್ನಾಟಕ ಜಾನಪದ ಅಕಾಡೆಮಿಯ ಮಾಜಿ ಅಧ್ಯಕ್ಷೆ ಮಾತಾ ಬಿ ಮಂಜಮ್ಮ ಜೋಗತಿ, ಅನ್ನದಾನ ಭಾರತಿ ಅಪ್ಪಣ್ಣ ಸ್ವಾಮೀಜಿ, ಶಾಂತಪ್ಪ ಪೂಜಾರಿ, ಬಾಲ ಪಟ್ಟಾಧಿಕಾರಿ ಮುತ್ತಪ್ಪ ಪೂಜಾರಿ ದಿವ್ಯಸಾನ್ನಿಧ್ಯ ವಹಿಸುವರು. ವಧು ವರರಿಗೆ ತಾಳಿ, ಬಟ್ಟೆ ಕೊಡುಗೆ ನೀಡಿದ ಸಚಿವ ಶಿವರಾಜ ತಂಗಡಗಿ ಅಧ್ಯಕ್ಷತೆ ವಹಿಸುವರು. ರಾತ್ರಿ ರಸಮಂಜರಿ ಕಾರ್ಯಕ್ರಮ ಇರಲಿದೆ ಎಂದು ಪ್ರಕಟಣೆ ತಿಳಿಸಿದೆ.
